ساعات نمشي نستركش في قهوتنا لهنا في الحومة , نهبط أكل لكسبرس و نشعل السيجارو نبدى نقرى في جريدة ولا حكاية. نهز راسي ياخي نلقي الجموع الكل مركزة في جهة وحدة. إلي هي جهة التلفزة. كي تراهم تقول درا شفما في التلفزة . تقول فما كارثة باش تصير والا صارت حاجة تفجع... في الحقيقة هي حاجات تفجع . نلقي فتيات جميلات يقومو بحركات ياسر مشبوهة . حركات عرضوني برشة في أفلام مش باهية...
أنا شخصيا , معنديش مشكلة معاهم , يشطحو ولا يزمروا , هوما أحرار. مالا فاش قام نحكيلكم عليهم ؟ لقيتهم يغنيو... بصراحة ياسر خايب المردود الفني متاعهم . هذي نظرة شخصية بالطبيعة . منعرش أنا . تقولش علاها وحدة تغني في الدوش و ما علبالها بحتا شي. ما حسيت بشي . نعرف أنا فنان كي يطلع باش يغني , يلزمو يوصل حاجة للي يسمع فيه . هكا ولا ؟ يلزمو صوت باهي و متناسق مع الألحان و الكلمات .
الكليبات لي نرا فيهم فارغين بأتم معنى الكلمة . فيهم تناسق صحيح , أما تناسق بين البزازل و الترم و غيرهم ... معناها بلوغة أخرى , الكليبات هاذم تنجم تتفرج عليهم و تشيخ من غير ما تستحق حاسة السمع-واللي هي الحاسة الوحيدة إلي نستحقوها باش نحكمو على غناية... ...
الفن المنحط هذا -مشو فن لماحالة- ولا عندو بعد اخر. كبر سدرك ولا طول شعرك و أكبس كرشك, تو تولي كل يوم في التلفزة كان عندك بالطبيعة فلوس.
الفن وين سرح و برا... مشيت كملت قريت الجريدة و تكيفت أكل سويجر....
